Hriangkhan Khua Tuanbia

Hriangkhan Website athei i a kan lengmi vialte pumpak nan cungah lunglawmh nak chimcawk lo kan ngei, hmailei zongah hika hmun te ahhin rak lengṭhan dingzong  kan i sawmṭhan hna.Hriangkhan Khua kong cu tampi chim awk cu a um lemloh, kannih Hriangkhan cu Thlantlang peng (Vailamtlang) chungah a um ve mi a si.

A fawinak in kan chim si ahcun Thlantlang khin Meng(mile) 25 tlukhrawng khi a hlat nak hmun ah a ummi khua a si. Thlantlang Khua in hriangkhan leiah kan kel(tlun) asi si ahcun Thlantlang khin Vuichip Tlangin  Thlualam khua cun Khintlang , Khintlang khin cun khuaza cuanh khawh a si, mah Khintlang cun Hriangkhan Khua zong cuanh(zoh) khawh a si. Khintlang in tlawmpel vunkel ahkhin Bual Peng Kelnak lamle Hriangkhan (tlun) kelnak lam aa ṭhencolh ve,Hriangkhan Khua kelnak lam cu Orh (Right) lei kam in kel a si. Mahcun saunawn vun kelṭhan ahkhin hmulipi he lam kan i ṭhennak a um ṭhan i mah lamṭhen in Keh(Left) leiin kel cun tlawmpel cun Hriangkhan (Arkhuan) thawng athei colh cang lai, mahkhin Meng(mile) 2-3 hrawngkhin Hriangkhan Khua cu a si cang.

Hriangkhan Sullam

Hriangkhan timi min hi khua anrak tlaak hlan pi ah a rak um cangmi asi.Hriangkhan timi min a putnak cu hriangthing a rak umnak hmun kha khaan ah an rak hot tawnnak hmun asi caah cu khaan cu ramsa an rak tamnak ngai hmun asi.Cu khaan an rak hnawh paoh ahcun sa pupuam kah loin an rak um bal lo.Atu khuahlun le Khuathar kar ai rehnak, Sayamah Sung Hnem te inn pawng khi asi. CJC biakinn le Baptist Biakinn karlak khi Hriangkhan timi cu a rak si i, cu min put cun atu”Hriangkhan” timi min hi arak ra.

Hriangkhan Khua Tlaaknak

Lai Ral ttih ah Tipi le Tio ral ah Mar pawl cu an zaam tikah Mar khua tampi cu a tthing i ram lawng ah an hung cang.Cu a lawngmi hmun ahcun laimi nih an hun rolh hna. Hakha zaathang le Thangtlang Cinzah an pennak ram a kau chin lengmang. Hriangkhan Khualu Hransetlang timi ah khin, Mar Fan-ai Khua pakhat a rak um ve. Cu Khua an ttio hnuah Thantlang in an hung tlaakmi asi.

Kim Dun Tlaakmi Khua

Thantlang in Cinzah Bawi nih khua tlatu dingah an run thlahmi cu Cinzah Kim Dun a rak si. Kim Dun nih a rak tlaakmi Khua hi Champibual tlang Khuarop Ngafuankawr cung tlaang khu a rak si.Thangse le La-Aw karlak ah a ummi Khua arak si. Zawtfah a rak tam ca le Kim Dun nih khuammi a rak hrem tuk hna caah Khuami nih khua thar tlaak an rak duh i, Kim Dun cu Khuabawi ah an rak duh lo. That Hlei tu kha an rak thim. Kim Dun tlaakmi Khua ahhin Kum khat tluk an rak um.

That Hlei Tlaakmi Khua

Kim Dun khua ah zawtfahnak le thihloh a tam tuk caah a saannak deuh Hriangkhan ah khua tlaak tthan dinginThantlang Upa nih an hnatlaakpi hna. Cu hleiah Kim Dun nih dai te le rem tein a uk khawh hna lo caah a naupa That Hlei in an rak thlen. That Hlei he khua hrihruaitu dingah Hlawnching Hrang Kual, Thlaceu Al Thai le Mualhlun Hme Al an rak si. Hriangkhan Khua hi zei tikah dah an rak tlaak ti hi hngalh set asi lo nain 1813 hrawng hi si dawh bik asi.

 

UKNAK LEI RIANṬUANNAK

  • Mirang Kai Hlan Uknak
    Mirang kai hlan i Hriangkhan Khua Uktu khuabawi hna cu a tanglei hna hi an si:
    (1) That Hlei
    (2) Za Ral
    (3) Than hnok
              Than Hnok uk lio ah hin Mirang an rak kai ti a si. Hriangkhan Khua cu Thantlang in tlaakmi a si caah Thantlang bawi nih rak zohkhenhmi a si i, anmah sinah sakhuah rawlrel an rak pek. Asinain, khua dang nih an rak pekmi sapherh, arti tbk cu an rak pe lo. Thantlang bawi nih an rak kholh hna lo. Hriangkhan Khua i khuabawi pawl Cinzah, Hlawnching pawltu kha sakhuah rawlrel pinah inn sakpiak le lothlawhpiak an rak si.
  • Mirang Chan Uknak
    Mirang chan lio khuabawi hna cu Cinzah le hlawnching an rak si. Mirang nih kha hna chunghnih kha an rak chanter hna. Mirang kai hnu i a hmasa bik khuabawi cu  Van Hup Hlawnching a rak si. Khuabawi pawl cu a tanglei ah kan langhter:
    (1) Van Hup, Hlawnching (1890-1910)
    (2) Than Hnok, Cinzah (1910-1920)
    (3) That Khuai, Cinzah (1921-1932)
    (4) Mang Kam, Hlawnching (1933-1942)
    (5) Lal Kio, Hlawnching (1943-1947)
  • Parliament Uknak Chan Lio Khuabawi Pawl
    1948 Independence hnu in khuabawi cu mizapi duh thiimmi an si cang. A hmasa bik mizapi duh thiimmi khuabawi hna cu:
    (1) Ṭial Nuai, Mualhlun (1948-1953)
    (2) Thang Chum, Biakzual (1953-1959)
    (3) Sa Hmung, Bawitlung (1960-1962)
    1962 ah hin Ne Win nih aana a ting i parliament uknak airawk i inhngak cozah in kum 1974 tiang an rak uk. Mah chan lio i khuabawi pawl hna cu a tanglei hna hi an si:
    (1) Sa Hmung, Bawitlung (1962-1963)
    (2) Hniar Luai, Hlawnching (1963-1966)
    (3) Sa Thuan, Rahtin (1966-1969)
    (4) Cung Dun, Hmunlei (1969-1974)
                  1974 in a voikhatnak Pyithu Council a rak i thok i 1988 tiang a si. Me thlaak in thiimnak a rak si. Cunglei Myone nih taarpiakmi minung kha khuabawi ah methlaak a rak si. Hriangkhan Khua le Hmunlipi hi ohsuh khat ah an rak kan komh. Mah uknak chan cu, socialist Lanzin Party ti a rak si. Sociallist chan lio i khuabawi hna cu mah hna hi an si:
    (1) Chan Ceu, Bawitlung (1974-1978)
    (2) Thawng Kung, Mualhlun (1978-1982)
    (3) Huat Cem, Kingbawl (1982-1984)
    (4) Thang Bik, Hlawnching (1984-1986)
    (5) Than Hrang, ( 1986-1988)
                Pu Huat Cem hi kum hnihnak a ṭuan lio 1984 ah ai phuak i Pu Hmun Thio(Hmunlipi) nih caan karlak a hun chaan. Mah kum lila in Pu Thang Bik nih khuabawi cu a hun tlaih i a hmai thiim kum tiang a ṭuan.
                1988 ah hin Socialist uknak airawk i ralkap uknak ai thok ṭhan. Ralkap cozah chung i khuabawi a ṭuanmi hna cu a tanglei hi an si. An ṭuan kum hi fiang setsai in hngalhkhawh a si ti lo caah an min lawngin kan langhter hna: Tlawmpal ah kan vunlanghter te hna lai…………

 

Comming Soon!

Comming Soon!