Comments are off for this post

Mino Le Fimcawnnak

MINO LE FIMCAWNNAK

Pathian lam hruainak thawngin kan laimi mino tampi ram thatnak ah kan hung phan ve cang hna. Mino cu a lung tthawngmi kan si. Kan mah le kanmah kan i bochan lio te a si. Kan i zuam ahcun thil ttha tampi a chuahpi kho ding kan si. Mino cu a lung ai thleng pengmi kan si i tuni ah zeihmanh lo te zong thaizing ah cun bochantlak mi kan hung si kho. Cun mino cu a lung a rang tukmi kan si i thil kan cawnnak ah awl zaang tein a cawng khomi kan si. Kan i tinhmi kha a hlawhtlin hlanlo tiang ai zuam khomi kan si fawn.Cucaah mino cu nihin mino thaizing hruaitu tiah an kan ti tawn. Kan dirhmun cu ai thleng lengmang mi a si i nihin le thaizing hmanh ah ai thleng khomi kan si. Cun ram hruaitu zong kan si kho. Tu chan ah cun upa nakin mino hi hmunhma le thazang pek deuh kan si cang. American ah cun upa thih nakin mino thih hi a poi an ti i an siang lo deuh hna. Aruang cu hngakchia le mino cu hmailei ah mi tthahnem kan si kho i ram nih bochantlakmi kan si khawh ruang ah a si. Cutluk in mino cu mi vantha kan si. Kan i zuamnak in ram hruaitu asiloah mah tein kan dirhmun ai cawisang khotu kan si. Kan i zuam i kan thil tuahmi ah lungtthul lo tein kan tuah ceomao ahcun hmailei ah huham ngeimi minung kan si lai. Kanmah tein dirhmun tha le hmunhma fekmi zohchunhtlakmi kan si khawhnak ding ah kan i zuam le fimnak kan cawn a herh.

Mino nih fimcawnnak cu kan nunnak ah kan herh tukmi a si. Fimcawnnak rak um hlah sehlaw, vawleipi hi pakpalawng a rak si hnga. Fimcawnnak cu mino kan nunning le kan dirhmun a kan thlengtu a si. Mino nih fimcawnnak kan ngeih lo ahcun miphun caah hruaitu si ding cu chim lo kanmah le kanmah hmanh kan i hruai kho lai lo. Cawnnak kan ngeih ahcun ram hruaitu kan si khawh lo hmanh ah ram remhtu kan si lai. Fimcawnnak cu khuakhan lairel thiamnak a si. Cawnnak timi cu thil tuah kan thiam rih lomi thiamnak ding caah le hmailei caah kan nun fim chimtu a si. Tu chan fimcawnnak hi buaktlak in kan zoh ahcun 19th Century lio he von tahchunh ahcun tamtuk kan tthangcho ti hi kan chim khawh. Atulio IT chan kan ti ko lai, hi caan hi fimnak a karh tuk cang i New Technology tampi a chuak nain, fimnak a tthawn tuk tikah a chuak tharmi new technology pawl zong an hlun colh lengmang. Tahchunhnak ah Mobile, MP3, MP4 le Computer te hna zong hi a thar a chuah tikah tlawmpal ah cun an hlun colh. Aruang cu, fimcawnnak a tthancho i a tthawn tuk caah a si. Cawnnak a tthancho tikah vawlei pumpi cu khua hmete ah a canter. Cawnnak in a chuakmi thilri in nu le pa, u le nau le khua le ram he fawi tein thawngpang kan i thei kho. Cucu cawnnak theipar an si. Mino caah fimnak cu hmailei kan caah Missionary bantuk asi i hmailei caah a lamkip in a kan bawmtu a si.

Mino nih fimcawnnak hi biapi bikah ruat hna usih. Khoika kan kalnak paoh ah mino le fimcawnnak hi ai tthen khomi a si lo. Fimcawnnak kan ngeih lo ahcun mah le mah bochannak le izumhnak a um kho lo. Ram tthatnak a phanmi le bang cu zei kan tuah paoh ah fimcawnnak hi a herh. Zeica tiah, fimcawnnak tello cun thil tampi kan i chuahsual tawn. Tahcunhnak kan chim a si ahcun, ram thumnak a phanmi laimi tam u cu cawnnak kan ngeih lo tikah tangka liam lo nakah kan liam tawn. An ram sining kha kan thei kho tawn lo i an ca kan rel kho tawn lo. Cu tikah, harnak tampi kan ton tawn. Cucu fimcawnnak kan rak ngeih lo caah a si. Mah le mah bochannak kan ngeihnak ding ahcun fimcawnnak hi kan rak ngeih hmasa a hau. Zeica tiah sau kan no lai lo. Kan no lio caan hi cawnnak ah kan thluak tthat lio te a si. Cu caah cawnnak ah i biatak deuh tein le kan caan um lio te ah kan i zuam a herh. Mino nih cawnnak ah thazang le ruahnak fak piin kan chuah a herh. Mino nih fimnak kan cawn nakah a hlan i nazi pakhat kan zoh tawnmi kha hmailei ca ruahchannak he nazi pahnih kan zoh a herh cang. Mino cu a thekvak tthami le a khulrangmi kan si caah kan cawnnak ah kan i zuam ahcun hlawntlinnak kha rianrang tein kan hmu kho lai. Fawi tein thil kan i cinken khawhnak cu kan upat hnu ah cun rian a ttuan kho ti lo. Cucaah mino nih kan caan a um lio te ah hin caan sawksam lo tein cawnnak ah i biatak awk a si. Cawnnak le mino cu hmunkhat ah a kal tti ding kan si. Mino cu hmailei caah ruahchanmi kan si ti kha kan i philh lo a herh.

Fimcawnnak cu mino kanmah ca hrimhrim ah a herhmi a si. Mino nih fimcawnnak kan ngeih ahcun kanmah tein hmunhma ttha kan i ser khawh lai. Fimcawnnak cu vawlei a hmunh chung kan min a tthattertu le mi caah hmantlakmi tuahsernak a chuah khotu a si. Mi minthang January 17, 1706 chuak Boston khuami Benjamin Franklin zong fimcawnnak he thil a rak tuah tikah a tuahsermi thilchuak cu a tu tiang kan hman peng. Electric lei hlathlainak a tuahmi a si. Ai zuamnak cu a ram ca lawng si loin, vawlei pumpi ca zong ah a si chih. Zuamnak he a tuahmi nih thiltha a chuahpi. Cu nihcun a min a tthatter pinah amah te nunnak ding lam ttha ai sial. Mino nih hi pa bantukin cawnnak ah lungthin tak in cawng hna usih. Mino hna nih hmailei caan kan si te lai dingmi tuak bu tein cawnnak ah i zuam hna usih. Mithmuh ral teinak ding caah cun hriamnam tha a herh tawn. Cu nakin a ttha deuhmi teinak cu fimcawnnak hi a si. Fimnak tha kan pek ahcun hmailei ah khua le ram, khrihfabu le miphun caah bochantlak kan si lai. Fimnak cu a kawltu caah cun hlawknak a si bantukin mino nih cawnnak cu a biapi ah chia hna usih. Fimnak cu kan nunning a kan thleng i a kan cawisangtu zong a si. Mino kan kut chung ah thil ti khawhnak tampi kan ngei. Cu kan ngeihmi thil ti khawhnak cu aho hmanh ttih lo tein cawnnak he kan tuah ahcun miphun nih bochanmi kan si lai. Cawnnak cu mipi caah tthathnemnak chuahpi khotu a si. Kan chungkhar, pumpak le miphun le ram tthanchonak ding ah a kan bawmtu fimnak hi mino nih ngeih khawh i zuam cio usih.

Vawleicung ram tthangcho hna i an tahfung cu fimnak hi a si. Cucaah, American ummi mino kan sining in kan chim a si ahcun a tam deuh cu an tahfung tling lomi kan tam. Mino nih cawnnak kan ngeih lo tikah rian soknak ah hnawl kan sining, mithmai ttha kan hmuh lo ning, kan ralchiat ning le rian ttha kan ttuan khawh lonak in kan hmuh khawh. Kan zawtfah caan le kan herhnak ah sii-inn he kan i chawnh khawh tawn lo ning le harnak kan ton ning hin kan theih khawh. Mino ciocio ko ah kan sining le kan nuncan kan i danning, kan co khawh ve ding thil zong kan hei co khawh lo ning zong in kan chim khawh. Zeitluk ngaihchia dah kan si. Cu nihcun fimcawnnak man a ngaih ning a langhter. Cucaah fimnak le mino hi ai tthen khomi a si hrimhrim lo. Cawnnak kan ngeih lo tikah kan no lio i kan thil ti khawhnak hmannak caan kan ngei kho ti lo. Cawnnak a ngeimi cu hawi nak thadam deuhmi an ttuan khawh pinah thlahlawh ttha deuh an hmu fawn. Cucu an no lio ah cawnnak an rak i biatak caah a si. Cawnnak a ngeimi cu an kalnak kipah ralchia lo tein an kal kho i a lamkip in tlamtlinnak an hmu i an tthangcho. Mino nih fimcawnnak kan ngaih ahcun hmailei ah a lamkip in tlamtlinnak kan hmu lai. Fimcawnnak tello cun tlamtlinnak a um lo. Cucaah mino nih kan no lio caan ah fimcawnnak hi a biapi bikah chia hna usih.

By-Sui Tin Par

Comments are closed.